LIVE: BUGESERA IGARAGUYE APR FC.

Oct 7, 2022 - 21:34 Updated: Oct 7, 2022 - 22:25

Ikipe ya Bugesera yigaranzuye APR FC iyihemura rugikubita itsinda ibitego 2 kuri kimwe.

Byatangiye ari inkundura hanze y'ikibuga amagambo adashira ivuga hagati y'abafana bamwe bahigira abandi kubaca kubeshya.

Bugesera yari itaratsindaho APR FC yari yakubiye agahimbazamusyi ku bakinnyi mu gihe baza gutsinda iyi kipe yigize akaraha kajya he?

Umunota wa 26 w'umukino wari uhagije ngo NSHUTI Innocent acecekeshe abafana ba Bugesera nyuma yo kunyeganyeza inshundura bitangira biryoshye.

Byabaye nko gukoza agati mu ntozi kuko Abakinnyi ba Bugesera bashakishisje igitego ku bubi na bwiza batitiriza bigera ku munota wa nyuma w'igice cya mbere kitaraboneka umusifuzi yongeyeho iminota 4 kubera imvune zagaragaye zitinza umukino.

Ako kanya Bugesera yaboneyeho itsinda ku munota wa 45+4' gitsinzwe na Vincent Adams bajya kuruhuka bangana kimwe kimwe.

Kugaruka mu kibuga n'imbaraga ntibyatinze ku bakinnyi ba Bugesera bongeye gutera igitutu izamu rya APR FC ku munota wa 3' w'igice cya kabiri[48'], Farouk Ssentongo anyabikamo icy'intsinzi itsindagiye.

APR FC mu mukara n'umweru abakinnyi bayo bakoze iyo bwabaga bacenga ubudacurera amashoti avuza ubuhuha bashaka guhanahana umupira neza biraza ariko icyizere cyo gutsinda kiraza amasinde birinda birangira uko.

Indirimbo z'abafana ba Bugesera basohotse sitade zikomeje kongeza umurindi mu gihe abafana ba APR FC bo batashye bifashe mapfubyi.

Nibwo Bwa mbere mu myaka 7, BUGESERA FC itsinze APR FC muri Shampiyona binatuma umutoza ADIL Erradi Mohamed ataha yimyiza imoso.