IBYO UTAMENYE SHAGGY YISABIYE BRUCE MELODIE.
sammy16
Orville Richard Burrell wamamaye nka SHAGGY byamenyekanye ko hari byinshi yasabye BRUCE MELODIE na mbere yuko bakorana indirimbo.
Aba bahanzi bombi bafitanye indirimbo nshya "WHEN SHE'S AROUND" ikomeje kuryohera benshi ku migabane itandukanye uhereye inaha mu Rwagasabo ukagera muri Jamaica.
SHAGGY nk'umunyabigwi ukomeye muri muzika y'isi kuva kera, Niwe wateye intambwe ya mbere asaba BRUCE MELODIE gukorana birangira basubiyemo indirimbo yitwa FUNGA MACHO niko kuyita WHEN SHE'S AROUND.
Ku mugoroba wo kuri uyu wa gatanu tariki 27 Ukwakira 2023 nibwo hasohotse amashusho n'amajwi yayo bongeraho n'ikiganiro kidasanzwe baganiriye basobanurira abakunzi babo uko umushinga wagenze n'uko byatangiye binyuze ku mbuga nkoranyambaga.
Iki kirangirire cyabanje kuvuga imyato BRUCE MELODIE mu magambo yuje ukwicisha bugufi, Ati " Reka mbanze ngushimire Bruce kubw'iyi ndirimbo wakoze idasanzwe, When She's Around yakomotse kuri Funga Macho."
Yunzemo ati " Nkiyumva bwa mbere numvise imiririmbire yawe yuje ubuhanga n'ijwi riyunguruye nk'igikoresho cya muzika. Ni igihangano gicurangitse neza cyuzuye umunezero cyane ku bacyumva bikora ku mutima, ibyo byose byarankuruye ubwo umuvandimwe wanjye STEVE yayicurangaga ndavuga nti iyi ndirimbo irihariye."
SHAGGY yasabye yinginga BRUCE MELODIE kuzamubera umushyitsi ndetse ko yiteguye kumwakira iwabo muri JAMAICA.
Ati "Ndakwinginze uzaze, ndumva ntategereza kukubona inaha muri Jamaica nzakwakirana urugwiro."
SHAGGY akimara kumusaba kuzamubera umushyitsi, yongeye kumwizeza abishimangira ko nawe bidatinze azaza mu Rwanda bagataramana umunsi umwe.
Si ubwa mbere bayiririmbanye imbere y'imbaga cyane ko mu cyumweru gishize mu ijoro ryo kuwa 21 Ukwakira 2023, ubwo hatangwaga ibihembo bya 'TRACE AWARDS' bakoresheje uburyo bw'ikoranabuhanga basusurutsa ababyitabiriye n'ubwo yari itarasohoka.
WHEN SHE'S AROUND imaze kuba inyuramatwi kuri benshi n'amashusho akoze biryoheye amaso, mu masaha make igiye hanze imaze kurebwa n'abarenga ibihumbi 170 ku rubuga rwa Youtube hatabariwemo izindi mbuga zicururizwaho muzika.
BRUCE MELODIE ukomeje kuba ubukombe azamura ibendera ry'u Rwanda n'i mahanga yizihiwe cyane no gukorana n'umuhanzi yakuze akunda, bimuha imbaraga zo gukora biruseho.
Mu gukaza umurego akora ubutaruhuka, kuri ubu yaraye mu gihugu cya Uganda aho yajyanye n'itsinda rigari rya 1:55 ENTERTAINMENT abarizwamo we na ELEMENT aho bagiye mu mishinga itandukanye.
WHEN SHE'S AROUND ubu wayireba hano;
