JUDE BELLINGHAM AKUBISE BARCELONA AHABABAZA.
sammy16
Ikipe ya BARCELONA FC ihuye n'uruva gusenya ikubitwa ibitego 2 kuri kimwe na Real Madrid mu mukino wari ishiraniro.
Byatangiye ikipe ya Barca isatira bikomeye ndetse ku munota wa 6 w'umukino biza kuyihira ILKAY GUNDOGAN yiba umugono ba myugariro ba Real Madrid abanyabikamo igitego kiryoheye ijisho aroba umuzamu Keppa ntiyamenya aho biciye.
Akimara gutsinda igitego yongeye kugerageza afatanyije na bagenzi be bihumira ku murari bahusha kenshi ku bitego byari byabazwe igice cya mbere kirinda kirangira BARCA ikiyoboye ku gitego cyayo rukumbi.
Iminota y'igice cya kabiri igitangira kwibara, Abasore ba Real Madrid bagarutse batarwiyambitse batsa umuriro imbere y'izamu rya Barca igitutu kiriyongera rubura gica.
Byasabye uguhahana kwiza maze bitunguranye JUDE Bellingham ahagaze inyuma cyane y'urubuga rw'amahina ashota ishoti riremereye igitego cyo kwishyura kiba kirinjiye.
JUDE ntiyoroheye na busa BARCA yakomeje kuyigera intorezo ariko ba myugariro bakomeza kwihagararaho ariko biba iby'ubusa ya nkoko iri iwayo inanirwa gushonda umukara ayikubita ikindi gitego mu minota y'inyongera 90+2' ayibabaza.
Abafana ba Barca bahise bacece bamwe batangira gutaha bimyiza imoso abandi basusumira batumva ibibaye.
Uyu musore w'Umwongereza niwo mukino yari ahuye bwa mbere na Barcelona 'El Classico' ku kibuga cyayo ayikorera ibya mfura mbi, ikipe ya REAL MADRID ikomeza kuyobora urutonde rwa Shampiyona.
