Ibigwi by'Umunyamisiri Mohhamed Salah wujuje imyaka 5 i Liverpool.
sammy16
Umunyamisiri Mohhamed Salah yujuje imyaka itanu amaze i Liverpool aho yakoreye amateka n'ibigwi bitandukanye.
Amasaha nk'aya,Itariki nk'iyi ukwezi nk'uku mu mwaka wa 2017 nibwo bwa mbere SALAH yambaye umwambaro wa Liverpool kuri miliyoni 36.9 asinyira gukinira iyi kipe avuye i Roma.
Akigera muri iyi kipe yishimiwe bikomeye n'abakunzi bayo ntibyatinda abongera ibyishimo ubwo yakandagiraga mu kibuga kikasa imitutu inshundura zikanyeganyega ibitego bikavuza ubuhuha Salah aserebura umusubirizo.
Mu mwaka we wa mbere i Liverpool yaciye agahigo atsinda ibitego 32 muri shampiyona y'imikino 38 anageza ikipe ye ku mukino wa nyuma wa Champions league.
Ntiyatezutse gukora ibidasanzwe mu myaka yakurikiyeho kuko yagiye ahangamura amakipe akomeye babaga bahanganye bishimangira ubushobozi bwe ndakemangwa.
Mohammed Salah
Kuva yatangira gukinira Liverpool mu mikino 254 yatsinze ibitego 156 n'imipira yatanze ivamo ibitego irenga 61. Yatwaranye na Liverpool igikombe cya shampiyona y'ubwongereza mu mwaka wa 2019/2020.
Yatwaye ibindi bikombe bikomeye nk'ikirusha ibindi ku mugabane w'iburayi UEFA Champions League yo mu mwaka wa 2019-2020 ubwo yatsindaga Tottenham Hotspurs igitego kihuse kuri penaliti yateye ku munota wa 2 birangira umunya-Kenya Divock Origi yunze mu rye atsinda ikindi ku munota wa 87 biba ibitego ku busa, uyu munyamisiri na bagenzi be begukana igikombe cyifuzwa na buri wese ukinira i Burayi.
Mohammed Salah ubwo yegukanaga Champions League
Mohammed Salah si ibyo yakoze gusa kuko yegukanye ibindi bikombe birimo FA cup imwe,Carabao Cup imwe,Uefa Super Cup imwe n'igikombe cy'isi cy'amakipe Club World Cup.
Nk'umukinnyi ku giti cye yatwaye ibihembo birimo icy'umukinnyi mwiza w'umwaka mu bwongereza inshuro 2, yegukana inkweto ya zahabu inshuro zirenga 3, yegukana n'umwanya wa 3 mu bakinnyi bose bo ku isi inshuro ebyiri mu mwaka wa 2018 na 2021.
Byagiye bivugwa kenshi ko ashobora kuva muri Liverpool ariko we akabihakana ndetse no muri uyu mwaka w'imikino ntawe uramenya amerekezo ye n'ubwo yivugira ko akiri umukinnyi wa Liverpool ukiyikunze.
Salah ubwo yegukanaga inkweto ya zahabu n'igihembo cy'umukinnyi mwiza w'umwaka
Isaha imwe irashize ashyize ubutumwa ku rubuga rwe rwa Instagram ashimira SADIO Mane wamaze kwerekeza i Munich nyuma y'igihe bari bamaze bakinana ku busatirizi bwa Liverpool.
Yamubwiye ati "Ndagushimiye kubw'ibihe byiza nkwifuriza ishya n'ihirwe aho ugiye. Tuzagukumbura twese."
Mohammed Salah na Sadio Mane
